Statens kunstnarstipend omfattar fem ulike stipendtypar. Sjå oppslaga på venstre menylinje for meir informasjon om kvart stipend. Kunstnarstipenda blir regulerte av Forskrift om statens stipend og garantiinntekter for kunstnarar. Stipend basert på gjennomført kunstutdanning har si eiga forskrift. Utvalet for statens stipend og garantiinntekter for kunstnarar tildeler òg Houens og Mohrs legatstipend, sjå oppslag under Legat på den øvre menylinja.
Kven kan søkje?
Kunstnarar som i hovudsak bur og arbeider i Noreg, kan søkje stipend. Det kan gjerast unntak om det blir vurdert som rimeleg. Ordninga gjeld berre einskildkunstnarar, ikkje grupper. Kunstnarar under grunnutdanning kan ikkje søkje om midlar frå denne ordninga.
Kriterium for tildeling
Ved tildeling av statens kunstnarstipend skal det berre leggjast vekt på kunstnarleg aktivitet og kvalitet. Det blir ikkje teke omsyn til medlemskap i kunstnarorganisasjonar. Sjå òg meir detaljert om kriterium under kvart einskild stipend.
Stipendutstilling (gjeld for søknadsrunden med søknadsfrist 15.10.2011)
Kunsthandverkarar som søkjer stipend, har plikt til å stille ut, men det kan gjerast unntak for søkjarar som arbeider med format eller innan uttrykk som vanskeleg let seg presentere i utstillinga. For fullstendige opplysningar om utstillinga for stipendsøkjarar kan søkjarar ta kontakt med Norske Kunsthåndverkere.
Biletkunstnarar og fotografar har ikkje plikt til å stille ut. Biletkunstnarar som søkjer digitalt, kan sjølve laste opp bilete til ei utstilling for stipendsøkjarar på Internett. For fullstendige opplysningar kan søkjarar gå inn på nettsida www.billedkunst.no/soknad.
Sist oppdatert 13.09.11